José Ramón Cólera, que nos seus comezos traballou na administración local, foi unha peza mestra do equipo fundacional da nosa comunidade autónoma, redactor das normas básicas de organización e funcionamento do noso Parlamento de Galicia ao que serviu con brillantez durante seis lexislaturas como oficial maior.
Tiven a oportunidade de traballar ao seu lado desde 1997 ao ano 2000 na miña etapa como deputado e Vicepresidente Primeiro do Parlamento de Galicia e puiden constatar o seu enorme rigor, coñecemento xurídico, capacidade de traballo, seriedade, discreción e entrega a un labor de altísima responsabilidade, todo iso desde unha exquisita independencia.
Ademais as súas calidades humanas, as súas profundas reflexións e a súa bonhomía serviron para que os seus compañeiros funcionarios do Parlamento de Galicia e os deputados que polo Pazo do Hórreo pasamos profesémoslle un profundo agarimo e admiración.
E eses sentimentos foron os que se respiraron hoxe no salón monumental do Hotel San Francisco, onde nos reunimos con José Ramón, familiares, amigos, compañeiros e unha ampla representación de deputados autonómicos de todos os signos políticos e lexislaturas.
