Asistín hoxe en Ourense o acto de presentación dos
candidatos da provincia de Ourense ao Parlamento de Galicia, que foi presidido polo líder do PPdeG, Alberto Núñez Feijóo.
Interveu en primeiro lugar o Presidente provincial, José
Manuel Baltar quen afirmou que a formación política ourensá, está preparada
para afrontar este novo reto electoral.
De seguido, falou Jesús Vázquez, que encabeza a candidatura,
que dixo que o gberno de Feijóo creu en Galicia e en que podía ser a
comunidade que mellor controlara o seu déficit, e Galicia acadouno, así como
conseguiu facer fronte aos seus compromisos sen acudir a ningún rescate, seguir
sendo a comunidade coas taxas universitarias máis baixas. Sinalou tamén o
compromiso coa provincia materializado en infraestruturas viarias, xudiciais,
sanitarias, educativas e no apoio as empresas mediante o plan Impulsa.
Pola sua parte, Alberto Núñez Feijóo asegurou, en nome do
equipo de candidatos, que se presentan con humildade e coa convicción de que
hai solución e saída para Galicia.
Trátase dun equipo con experiencia de goberno, de xestión
e parlamentaria a disposición dos galegos, porque Galicia non ten tempo que
perder, e nese equipo hai un goberno con capacidade para gobernar ata o último
día desta lexislatura e desde o primeiro día da seguinte.
Dixo ademais, que tamén é un equipo con certezas, que di a
verdade, que xestiona a realidade e que conta cos cidadáns e que ten posto o
100% das súas forzas e da súa atención en tratar de sacar este país adiante.
Nese equipo, no que están conselleiros e conselleiras e
membros do goberno, actuais e futuros, xestiónase con responsabilidade, con
capacidade de anticipación e fai da Xunta un instrumento útil para resolver
problemas.
Segundo Feijóo, os candidatos do PPdeG para as vindeiras
eleccións conforman un equipo unido cun proxecto común, entre si e cos galegos,
e non é outro que Galicia.
Así mesmo, o presidente do PPdeG fixo fincapé en que o
Goberno ao que aspiran está nas súas listas e está na rúa porque queren contar
con todos os galegos pero non está noutra lista e iso é algo que só pode dicir
o seu partido e ninguén máis en Galicia.
Nesta liña, asegurou que os populares non se presentan cun
proxecto económico de rigor e responsabilidade para logo cederlle esa
responsabilidade a calquera outro partido, senón que por conveniencia propia,
non renunciarán ao que cren que máis convén a Galicia.
