Hoxe no Parlamento de Galicia tivo lugar o discurso de investidura do candidato do PP de G o ourensán Alberto Núñez Feijóo.
Estas foron as principais liñas da súa intervención:
TRANSICIÓN CARA O CRECEMENTO
• Anunciou a creación dun Fondo para o Crecemento, que primará investimentos estruturais e infraestruturas que melloren a competitividade de Galicia e que nace co obxectivo de lograr emprego neto nesta lexislatura.
• Desenvolverá en 2013 un plan de axuda aos emprendedores, que inclúe catro rebaixas fiscais e incentivos de financiamento destinados especialmente aos mozos desempregados.
• Ve prioritario profundar na aposta pola innovación e anuncia neste senso a posta en marcha dun Programa de Captación de Talento que reteña aos investigadores na Comunidade.
BLINDAXE DOS SERVIZOS PÚBLICOS
• Comprometeu máis sanidade pública na próxima lexislatura, cunha Lei inédita que garanta tempos máximos de espera e continuando o impulso ás seis infraestruturas hospitalarias en marcha.
• No eido da educación, anunciou unha Lei de Formación Permanente e a reordenación dos fondos de formación para que actúen como unha verdadeira política de emprego, así como retomar a tramitación da Lei de Universidades para lograr unha oferta máis racional.
• Avanzou a creación doutras 6.000 novas prazas públicas de residencias, centros de día e escolas infantís, como ocorreu na pasada lexislatura.
• Como medida adicional para os afectados por desafiuzamentos, dixo que poñerá á súa disposición o parque de vivendas de promoción pública baleiras ou sen adxudicar.
MÁIS SOLVENCIA
• Garantiu que blindará a solvencia de Galicia como na pasada lexislatura para que siga financiándose sen sobresaltos e se manteña como unha das comunidades que paga en menos tempo aos seus provedores.
• Anunciou que Galicia é a única comunidade que xa ten completado o seu Programa de Endebedamento para este 2012 e proponse reducir a débeda autonómica respecto ao nivel actual e á media das comunidades.
• Dixo que a estabilidade das contas públicas permitirá volver ser a autonomía con menos axustes o próximo ano e que o próximo goberno non atope buratos económicos nin facturas nos caixóns.
A VERDADE DA SITUACIÓN
• Confíou en que Galicia volverá a falar de crecemento nesta lexislatura pero matiza que 2013 será aínda moi difícil e que haberá que seguir traballando na transición económica nos dous próximos anos.
• Plantexou a necesidade de redobrar esforzos para lograr unha aterraxe suave dos fondos europeos e proporá ao Goberno central a creación dun foro permanente que garanta unidade de acción coas comunidades que tamén deixan de ser Obxectivo 1.
• Dixo que remitirá ao Estado un estudo sobre o financiamento autonómico para que se reforcen os instrumentos de cohesión e para que o CPFF recupere o temón na elaboración do novo modelo.
• Mantén vixente a aspiración dunha entidade vinculada a Galicia e comprometeuse a seguir tutelando que se respecten os intereses dos emprendedores e dos aforradores galegos.
COMPLETAR A REFORMA INSTITUCIONAL
Máis austeridade:
• Dixo que Galicia seguirá contando co goberno máis reducido de todas as nacionalidades históricas, en altos cargos e persoal de gabinete, e anuncia a terceira fase do Plan de Racionalización da Administración paralela.
• Urxiu aos concellos a ordenar a táboa salarial dos cargos municipais, plantexa estudar unha nova redución das subvencións a partidos, sindicatos e patronal e dará cumprimento á proposta de reducir o número de deputados avalada polas urnas.
Máis disciplina orzamentaria:
• Aspira a que Galicia siga sendo pioneira no control dos cartos públicos e avanza a elaboración dunha nova Lei de Réxime Financeiro que medirá a través de 400 indicadores os resultados de cada euro investido.
Máis eficiencia:
• Dará continuidade á busca de ineficiencias na Administración, potenciando a contratación centralizada dos servizos da Xunta ou cun sistema electrónico de presentación de avais
• Insistiu en que lograr máis eficiencia nos servizos públicos é a mellor maneira de poder amplialos e nesta liña poñerá en marcha unha Plataforma Loxística de material sanitario e consolidará a aposta polo aforro farmacéutico
Máis cooperación:
• Reiterou a súa aposta polo maior entendemento entre os pequenos municipios e plantexa que tamén as grandes cidades se involucren neste proceso para consolidarse como referentes de poboación europeos.
• Recordou os froitos do Diálogo Social na pasada lexislatura con máis dunha trintena de acordos e plantexa a necesidade de darlle continuidade nos próximos anos con novos acordos.
PLANIFICACIÓN TERRITORIAL E DOS SECTORES PRODUTIVOS
• Plantexou un pacto para o rural, cunha nova regulación que evite o abandono, facilite a volta ao rural e loite contra o minifundismo, así como cun programa de ordenación forestal que suporá case 40.000 xornais de traballo.
• Propuso continuar cunha nova Lei do Solo consensuada e con vocación de permanencia a ordenación territorial iniciada coas Directrices de Ordenación do Territorio e o Plan do Litoral.
• Agarda alcanzar o peche da fenda tecnolóxica achegando a Banda Larga ao 100 % dos galegos en 2013 e cunha nova Lei de Telecomunicacións que considere as novas tecnoloxías un servizo tan esencial como a auga ou o saneamento.
• Avanzou a próxima aprobación dun Decreto de Comercialización para vender mellor os produtos pesqueiros e unha Lei de Acuicultura que permita recuperar o liderado do sector.
• Destacou os avances logrados no sector naval, como o novo sistema de tax-lease recentemente aprobado ou cos pedidos efectivos tanto para os estaleiros públicos como privados.
• Dentro do apoio aos sectores produtivos, tamén comprometeu seguir propiciando a fabricación de novos modelos de automoción en Galicia así como acompañar á industria auxiliar a abrir novas vías de negocio noutros mercados
RESPONSABILIDADE POLÍTICA
• Comprometeuse a gobernar para todos e asegurou que a maior ofensiva de Galicia se é investido Presidente dirixirase contra o paro e contra a crise económica
• “Estamos en Europa e somos Europa. Estamos en España e somos España. E todo iso porque estamos e somos Galicia”, subliñou.
• Pediu trasladar a Galicia real ao Parlamento nunha Galicia que aspira a reivindicar en España “non coa estridencia, senón co exemplo”
