Con interés presencie a mesa redonda, moderada por Miguel Santalices, na que participaron José Manuel Rodríguez, Carmen Pardo e Carmen Yáñez. A internacionalización e as comunicacións centraron boa parte das exposicións, claves á hora de vender o producto, neste caso o Turismo vinculado ao Termalismo. A cultura emprendedora e a formación convírtense así en eixos fundamentais para dar saída cara o exterior aos recursos endóxenos de Ourense. Precisamente, a centralidade da provincia no tocante ás comunicacións é unha vía para captar visitantes atraídos por dous dos grandes exponentes galegos: o seu litoral e o Camiño de Santiago. "A marca de Ourense debe estar vinculada á de Galicia e conseguir que a xente veña cara nós e se queden", sinalou José Manuel Rodríguez.
A globalidade de internet tamén é un factor que debe ser explotado, segundo se puxo de manifesto nesta mesa redonda, dado que é o escaparate máis importante da actualidade. "Hai que acadar que a xente se apaixone por vender os atractivos de Ourense, primando o talento e a creatividade", precisou o xerente do Inorde.
A alcaldesa de Lobios e presidenta da sección de Vilas Termais da FEMP, María del Carmen Yáñez, centrou a súa intervención no Termalismo. Os recursos hidrominerais como potencialidade, que supón a posta en valor de todos os recursos patrimoniais da área de influencia. O 75% dos municipios que posúen este recurso non superan os 5.000 habitantes e que teñen a enorme posibilidade de desestacionalizar o turismo, xa que non depende directamente da meteoroloxía. E Carmen Yáñez matizou a importancia, dentro da área da Medicina, do Termalismo con enormes posibilidades terapéuticas, o cal está directamente relacionado co Turismo de Saúde. "O Termalismo é un axente dinamizador da vida económica dos municipios, cunha importante incidencia da creación de emprego", sinalou a alcaldesa de Lobios, cun importante apoio das administracións, como é o caso da Xunta de Galicia e da Deputación de Ourense.
A clausura foi realizada polo presidente provincial, Manuel Baltar, e polo portavoz do Grupo Popular do Parlamento de Galicia, Pedro Puy Fraga.
Lembrou que a Escola de Verán foi un compromiso persoal que asumiu cando foi elixido presidente provincial en 2010. A lembranza de Miguel Ángel Blanco estivo daquela presente e perdura a día de hoxe coa mesma forza e loitando a prol do máis importante en política: os dereitos fundamentais e liberdades públicas. Tamén agradeceu ao alcalde anfitrión, Argimiro Marnotes, o seu traballo á fronte do Concello do Carballiño, "un traballo feito con rigor, seriedade e bo facer", sinalou. Non deixou de agradecer a todos os membros do PPOU, personificados nos 546 concelleiros populares da provincia, os recientes resultados electorais nas pasadas Eleccións Europeas. "Persoas e ideas son os fundamentos do PP de Ourense", precisou. No tocante á Escola de Verán, recalcou a dificultade de convocar durante tres días do mes de xullo, "xa que somos a única formación política que estamos facendo actividades".
Pola súa banda, Pedro Puy Fraga (ao que Manuel Baltar agradeceu expresamente a súa dispoñibilidade sempre que o PPOU o invita a participar nalgunha das súas actividades), felicitou ao PP de Ourense pola súa magnifica iniciativa da Escola de Verán e pola elección no nome en recoñecemento a Miguel Ángel Blanco.
Na súa intervención, tamén fixo referencia á importancia das organizacións políticas para “converter os intereses particulares, moitas veces diverxentes, nun interese compartido, de xeito que se impulse o interese público que é o mellor para toda a comunidade”.
A modo de exemplo, Puy situou o turismo, “pola súa importancia para a economía e o benestar nas múltiples variedades que se pode gozar: de praia, cultural, deportivo ou náutico, entre outras”. Neste sentido, salientou o traballo realizado polo actual Goberno galego neste ámbito, coa aprobación dunha nova Lei para o sector, a creación da Axencia Galega para o Turismo, o Plan Estratéxico posto en marcha a difusión do Camiño de Santiago ou facilitando a implantación da Q de calidade turística.
“Trátase de desenvolver o sector turístico galego como unha política económica fundamental para Galicia dun xeito transversal, do que formen parte aspectos como a ordenación do territorio, a paisaxe ou o coidado da natureza”, dixo.
Para rematar, Pedro Puy subliñou que “non hai mellor exemplo de dedicación ao interese común e de procura do ben colectivo que o que nos deixou Miguel Ángel Blanco, de quen se celebra o XVII aniversario do seu pasamento a mans da banda terrorista ETA”
Si desexa facer algún comentario poder enviar un correo a celso.delgado@congreso.es
Recibirá resposta
