.jpg)
Noutras entradas deste blog teño falado de que o actual
goberno da Xunta de Galicia levou a cabo nestes últimos anos un importante
esforzo económico (superior aos 50 millóns de euros) en materia de
infraestruturas xudiciais, tanto en novas construcións, como en reformas ou
ampliacións.
Uns investimentos e o aproveitamento dos actuais edificios
xudiciais que diciamos deberían ser tidos en conta á hora de deseñar a nova
organización territorial xudicial.
Nesa liña de actuación, coñecíamos onte que odirector
xeral de Xustiza, Juan José Martín, e o delegado territorial da Xunta en
Ourense, Rogelio Martínez, visitaron o edificio do xulgado da Pobra de Trives,
no que o Goberno galego vén de realizar unhas pequenas obras de mellora que
continuarán o vindeiro exercicio.
Os representantes da Xunta comprobaron o resultado dos
traballos levados a cabo, que consistiron fundamentalmente na instalación dunha
marquesiña, a substitución da porta principal e a pintura dos interiores. As
obras completaranse no vindeiro exercicio cando está previsto que se realicen
traballos de climatización e un cambio das fiestras. O orzamento de todas estas
actuacións rondará os 30.000 euros.
Ademais, a estas obras hai que sumarlles a instalación
este mesmo ano dunha caldeira de biomasa por parte da Secretaría Xeral Técnica
da Vicepresidencia. Esta obra terá un orzamento de 28.000 euros -cofinanciados
grazas a unha axuda dos FEADER- e redundará nun importante aforro de
combustible para o xulgado, situado nunha zona de alta montaña.
Este proxecto de mellora levado a cabo no xulgado da Pobra
de Trives enmárcase dentro do compromiso do Goberno galego coa Administración
de Xustiza, unha aposta que se materializou no Plan de Infraestruturas
Xudiciais, unha ambiciosa planificación que fixo a Xunta para facer fronte ás
necesidades de infraestruturas da xustiza, así como prever as necesidades
futuras.
O obxectivo deste Plan é que Galicia conte cunha rede de
infraestruturas “próxima e adecuada” que permita aos cidadáns acceder á Xustiza
nas mellores condicións. Así, xunto á construción de edificios xudiciais de
nova planta ou obras de rehabilitación, presta especial atención ao estado,
mantemento e renovación das infraestruturas dos partidos xudiciais máis
pequenos, como é o caso da Pobra de Trives.
Estas obras, destinadas a mellorar o día a dia dos
traballadores dos xulgados e dos cidadáns que acoden a eles, consisten na súa
maioría en traballos de climatización, reparacións de fachadas, instalación de
fiestras e ascensores e outras obras de mantemento.
Nestas “obras menores” a Xunta investiu este ano máis de
260.000 euros en todo Galicia, dos cales preto de 60.000 foron na provincia de
Ourense, onde se fixeron melloras en xulgados como os de Carballiño, Xinzo de
Limia, Celanova, Ribadavia, Verín ou Trives.
Sen dúbida unha bona nova para o servizo público de
xustiza que debe chegar en condicións de calidade a todos os cidadáns con
independencia do lugar onde vivan.
Si desexa facer algún comentario poder enviar un correo a celso.delgado@congreso.es
Recibirá resposta
