O presidente do Goberno galego, Alberto Núñez Feijóo, en rolda de prensa, acompañado do Conselleiro de Facenda, Valeriano Martínez, subliñou que poñen a disposición dos
cidadáns 400 millóns de euros máis, e acreditan que a responsabilidade dos
últimos anos foi útil para que Galicia estea agora en condicións de seguir
reducindo o desemprego e de facer medrar a súa economía; e para dirixir a
recuperación das contas públicas á recuperación dos galegos e das galegas.
Feijóo asegurou que os galegos que
máis o precisan terán máis medidas de apoio á súa disposición; que pagarán
menos impostos; que as familias con nenos terán máis axudas que nunca; que as
persoas en situación de desemprego e os emprendedores contarán tamén con máis
liñas de apoio; e que os servizos públicos seguirán asegurados a todo risco
porque contarán con máis presuposto para seguir mellorando as súas prestacións.
O mandatario galego salientou que,
despois de catro anos de presupostos á baixa e dous nos que a Xunta foi quen de
estabilizar o gasto, hoxe por primeira vez desde que comezou a crise o Goberno
galego presenta uns orzamentos expansivos; é dicir, que medran de forma
significativa porque supoñen un 4,3% máis de recursos que as contas de 2015. “Alcanzamos
a recuperación das contas públicas desde a estabilidade das contas públicas”.
Na mesma liña, subliñou que no próximo exercicio Galicia seguirá mantendo un período de pago razoable a provedores; e que os gastos financeiros en 2016 baixan máis dun 19%.
Resumo do seu contido:
Os Orzamentos medran un 4,3% e ascenden ata os 8.804 millóns de euros.
A maior baixada fiscal da Autonomía terá un impacto de arredor de 140 millóns.
O gasto non financeiro aumenta en 365 millóns, ao que se suman os 65 millóns de euros de aforro en xuros da débeda grazas á boa xestión.
O Goberno galego revisa á alza o crecemento da economía galega para 2016, que será do 2,5%, mentres que a taxa de paro baixará case 2 puntos.
Os investimentos medran un 14%, o gasto en sanidade e educación aumenta en case 200 millóns de euros, e os fondos para políticas de emprego crecen un 15%.
No eido social, a Xunta destinará 324 millóns á dependencia para incorporar 10.000 novos beneficiarios, e dedica 20 millóns ao plan de loita contra a desigualdade.
Os Orzamentos inclúen unha tarxeta familiar de 100 euros mensuais por neno nado a partir do 1 de xaneiro de 2016.
A rebaixa do IRPF beneficiará o 98,5% dos contribuíntes e permitirá un aforro de ata 380 euros por persoa.
Os empregados públicos terán un incremento salarial do 1% e recuperarán o 50% restante da paga extra de 2012.
As contas aprobadas hoxe polo Executivo galego garanten de novo a redución do déficit e o cumprimento do obxectivo de estabilidade para 2016, fixado no 0,3%.
Si desexa facer algún comentario poder enviar un correo a celso.delgado@congreso.es
Recibirá resposta