Segundo destacaba hoxe o
vicepresidente, Alfonso Rueda, por primeira vez desde 2010 a Xunta atópase en
condicións de abrir un proceso negociador para revisar o baremo económico que
perciben os profesionais por atender a quenda de oficio.
O vicepresidente e conselleiro de Presidencia, Administracións
Públicas e Xustiza mantivo hoxe unha reunión co presidente do Consello da
Avogacía Galega, Evaristo Nogueira, e outros membros da entidade precisamente
co obxectivo de iniciar a negociación destes conceptos e baremos.
Rueda destacou o esforzo realizado durante os anos de crise para
manter a contía destinada á quenda de oficio, así como a redución nos tempos
dos pagamentos para avogados e procuradores, que actualmente se sitúa nunha
media de 20 a 30 días.
Nesta liña, hai que destacar que tal e como recolle hoxe o
Diario Oficial de Galicia, a Xunta vén de aprobar a dotación adicional para
atender os gastos derivados do funcionamento operativo dos servizos colexiais
de asistencia xurídica gratuíta. Con esta dotación adicional acádese o 8% do
total devindicado durante o ano 2015 en concepto de asistencia letrada e
defensa gratuítas, igualando así a porcentaxe fixada para os colexios de
avogados e mais para os colexios de procuradores.
Hai que ter en conta que a Xustiza rexistrará en 2017 un máximo
histórico en canto á partida para esta materia, cun total de 140 millóns de
euros de orzamento, onde se inclúe a contía para xustiza gratuíta, 11 millóns,
así como un ambicioso plan de infraestruturas xudiciais con obras como a
rehabilitación da Fábrica de Tabacos da Coruña ou a nova Cidade da Xustiza de
Vigo.
Sen dúbida unhas boas novas xa que o servizo público de xustiza
e fundamental para o bo funcionamento do Estado de Dereito.
Recibirá resposta
