Salientar a celebración onte no Parlamento de Galicia
do debate de totalidade do proxecto de Lei de Orzamentos para 2017. Nel o conselleiro de Facenda, Valeriano Martínez explicou que a Xunta negociará coas
organizacións sindicais a aprobación neste ano dunha oferta de emprego público
que, como mínimo, iguale o número de prazas ofertadas en 2016. A Administración
galega prevé ofertar no entorno de 3.000 prazas de emprego estable para
reforzar os servizos públicos, nomeadamente, sanidade, educación e servizos
sociais.
Martínez explicou que os Orzamentos para 2017 manteñen
a liña expansiva xa iniciada o pasado ano, e lembrou que a Xunta disporá duns
600 millóns de euros máis que en 2015. En concreto, a Administración galega
contará este ano cun Orzamento de 9.063 millóns de euros, o que supón un
incremento do 2,9% sobre o de 2016.
Tamén detallou que a Xunta contará este ano cun nivel
de recursos orzamentarios comparables en termos homoxéneos ao ano 2009. Nese
exercicio “había un orzamento de 10.581 millóns, pero realmente estaba inflado,
como probou a liquidación negativa que ese ano foi de 1.600 millóns de euros,
polo que a capacidade real de gasto roldaba os 9.000 millóns de euros”,
subliñou o conselleiro na súa intervención.
Neste sentido, o conselleiro indicou que, con niveis
de gasto similares, o Goberno galego destina agora máis recursos a sanidade e a
educación. Así, o actual Executivo destina a sanidade cinco puntos máis de
recursos que o anterior e xa concentra en políticas sanitarias o 40% do gasto
total, mentres que na educación dedícanse dous puntos máis que en bonanza
económica, ata aproximarse ao 25% dos recursos totais para políticas
educativas. “Só este ano aumentamos os recursos para gasto social en 229
millóns”, engadiu.
O titular de Facenda resaltou tamén que Galicia está
no seu mellor momento económico dos últimos oito anos, xa que o Produto
Interior Bruto (PIB) galego medra a un ritmo anual do 3,3% -máis que a economía
española- e os principais indicadores macroeconómicos mostran unha evolución
positiva. Con todo, incidiu en que “non están superadas todas as dificultades”
e por iso estes Orzamentos teñen como principal obxectivo consolidar o
crecemento económico e trasladar a recuperación a todos os fogares de Galicia.
Valeriano Martínez explicou que os Orzamentos da Xunta
para 2017 apostan pola mellora do mercado laboral e a creación de postos de
traballo, co obxectivo de seguir reducindo o paro a través de 20.000 novos
empregos. As contas autonómicas tamén inclúen novas baixadas de impostos
–centradas no eido rural e coa prioridade de fixar poboación-, ao tempo que
reducen o déficit, incrementan os investimentos e reforzan o gasto social.
O gasto total da Xunta en 2017 aumentará en preto de
260 millóns de euros, segundo reflicte o proxecto de lei debatido hoxe. A esta
cantidade hai que sumar case 40 millóns de aforro nos xuros da débeda, polo que
a capacidade de gasto medra en 300 millóns de euros. “Temos feito moito pero
resta moito por facer”, explicou o conselleiro, que recalcou a importancia de
contar cun Plan Estratéxico como folla de ruta ata 2020.
Entre as novidades incluídas nos Orzamentos da Xunta
figura a reanudación do pago do complemento específico nas pagas extras ao conxunto
dos empregados públicos da Administración galega, unha medida pactada coas
organizacións sindicais e que beneficiará ao persoal da Xunta, da sanidade, o
ensino, as universidades e o ensino concertado.
Finalmente, Valeriano Martínez garantiu que Galicia
terá unha posición “única e de país” cando se aborde a reforma do financiamento
autonómico. “O Goberno galego será coherente e defenderá o que sempre defendeu,
os intereses de Galicia”, avanzou o conselleiro, tras explicar que a actuación
da Xunta será “de maneira responsable, pero firme, para que os galegos e as
galegas teñan o financiamento que precisan”.
Na súa intervención, avanzou que Galicia defenderá un
debate centrado nas necesidades de financiamento dos cidadáns e non en
principios identitarios. ”E apostamos por obxectivar custes para saber o que
supón prestar servizos en cada territorio e que teñan idéntica calidade con
independencia do lugar de residencia”, sinalou, ao tempo que lembrou que Galicia
demandará na Conferencia de Presidentes de mañá que na revisión do modelo de
financiamento autonómico haxa unha peza separada para sanidade.
Recibirá resposta
