Interveño á primeira hora de hoxe no programa Voces de Galicia de Radio Voz,
que moderou Eva Millán e compartindo micrófono con Pablo Mosquera.
O tema principal tivo que ver coa comparecencia
de onte no Parlamento na que o presidente da Xunta, Alberto Núñez Feijóo, falou
da extraordinaria vaga de lumes e sobre todo das respostas ao sucedido e tamén das
respostas para o futuro.
Valorei como moi positiva a proposta de Feijóo
de creación no Parlamento dunha comisión específica para buscar un acordo de
país sobre a política forestal que blinde a unidade de criterio e a unidade de
acción.
E falei dalgunha das 30 medidas nas que
propuxo traballar conxuntamente en tres frontes distintas, pero converxentes:
no eido da prevención, no eido da ordenación e no eido da dinamización
socioeconómica.
Sobre prevención,
lembrei que a día de hoxe, 3 de cada 4 euros da loita contra o lume xa van para
esa finalidade, pero é certo que hai que traballar con máis intensidade aínda.
Destaquei a necesidade dun acordo coa
Administración local para incentivar economicamente a limpeza dos montes,
especialmente nas faixas secundarias (as que están na contorna dos núcleos).
Tamén valorei como moi positiva a
creación dos Equipos Forestais de Investigación, que ampliará e permitirá
especializar o traballo que ata agora realizaban as Brigadas de Investigación
de Incendios Forestais.
Haberá un mínimo de tres axentes dos
Equipos Forestais de Investigación en cada un dos 19 distritos forestais de
Galicia, é dicir, un mínimo de 57 axentes. E que crearanse ademais os Equipos
de Vixilancia de Incumprimento para velar por que se cumpran as medidas
incluídas na normativa forestal e de defensa contra incendios.
Tamén dixen que é moi importante dotar á
Xustiza de instrumentos para darlles aos incendiarios unha resposta
proporcional ao inmenso dano que provocan, xa que todos os incendios forestais
comportan un risco potencial para a vida das persoas.
Logo a moderadora quixo que fixeramos unha valoración da enquisa
do CISS que foi difundida onte.
Dixen que se trata dunha mostra fiable,
pero que a enquisa se realizou do 2 ao 11 de outubro, e reflicte o impacto da
celebración do referendo ilegal do 1 de outubro e das imaxes das cargas
policiais, do discurso do Rey e a
declaración unilateral de independencia que Carles Puigdemont suspendeu
inmediatamente no seu discurso do 10 de outubro ante o Parlament. Pero que esta
sondaxe non reflicte episodios posteriores como a activación do artigo 155 por
parte do Goberno de Rajoy e acontecementos posteriores.
Destaquei que pese ao desgaste das
medidas adoptadas polo partido que apoia ao Goberno, o PP obtería un 28% dos
sufraxios (oito décimas menos que en xullo); polo 24,2% do PSOE (que perde sete
décimas); o 18,5% de Podemos (que perda case dous puntos); e o 17,5% de
Cidadáns (que mellora en tres puntos o seu rexistro), beneficiada pola súa
posición sobre o tema de Cataluña
Puxen de manifesto que segundo esta
sondaxe o centro dereita que representa PP e C´s sumaría o 45,5% dos sufraxios
polo 43,3% de xullo e o 42,6% das xerais de 2015.
E que a distancia entre PSOE e PP
mantense a unha distancia similar, á vez que destaquei o considerable descenso
de PODEMOS que vai aparellado sen dúbida ás súas posicións favorables aos independentistas en relación coa crise de Cataluña.
Si desexa facer algún comentario poder enviar un correo a celso.delgado@congreso.es
Recibirá resposta
