Saliento o anuncio feito este xoves por parte do presidente Alberto
Núñez Feijóo, relativo ao inicio da tramitación do Plan de Transporte Público
que permitirá que a nosa Comunidade arranque 2020 con todas as liñas
modernizadas e adaptadas ás necesidades dos cidadáns. “Galicia será así a 1ª
Comunidade Autónoma que cumpra a normativa europea de licitar todas as liñas de
transporte público por estrada”, dixo.
Feijóo
precisou tamén que ao longo deste proceso, todos os colectivos ou particulares
interesados poderán achegar as súas recomendacións, suxestións e propostas para
mellorar o plan, cuxas liñas estratéxicas son: facilitar a mobilidade das
persoas en termos de igualdade, seguridade, calidade, eficiencia social e
sustentabilidade económico-financeira e ambiental; fomentar o uso do transporte
público, harmonizando oferta e demanda, mellorando e estendendo as liñas e
modernizando o servizo; e impulsar a intermodalidade, de xeito que o transporte
público se reforce como alternativa ao transporte particular.
O
presidente da Xunta aseverou que nestas liñas queda patente a orientación
social desta iniciativa, que se plasma noutros proxectos xa en marcha como: a
Tarxeta Xente Nova, que ofrece viaxes metropolitanas gratuítas aos menores de
19 anos; os descontos ao transporte de familias numerosas; e, con respecto ao
persoal de transporte, a aposta pola subrogación dos traballadores e pola
mellora da súa formación.
Así
mesmo, esta estratexia axudará a definir os proxectos de explotación de cada
unha das concesións, que se deseñarán en función dos estudos de campo que van
realizar. E, unha vez definidos, estes proxectos de explotación volverán ser
sometidos á información pública, para que os colectivos interesados poidan
presentar achegas xa máis polo miúdo.
“Deste
xeito, serán os profesionais e os usuarios quen definan as liñas de transporte,
no respectivo aos itinerarios, as frecuencias, o número de expedicións e os horarios”,
explicou, ao que engadiu que, ademais, seguirase apostando polo transporte
compartido (escolar-ordinario) e polo transporte a demanda nos casos nos que
sexa necesario, coa finalidade de que non quede ningún viaxeiro sen transporte,
pero tampouco ningún transporte sen viaxeiros.
O
cronograma dos próximos pasos a seguir para a aprobación do Plan de transporte
público de Galicia será o seguinte: de xeito inminente someterase a información
pública o documento base do plan; no segundo semestre deste ano, iniciaranse os
traballos de campo para redeseñar o mapa de concesións; e, entre finais de 2018
e o primeiro trimestre de 2019 se redactarán e someterán a información pública
os proxectos de explotación.
Sobre
este punto, Feijóo precisou que estas dúas últimas fases adiantaranse no caso
dos contratos adxudicados en agosto de 2017. Estes contratos, que teñen unha
vixencia máxima de dous anos, serán licitados no segundo trimestre de 2019 e
comezarán a prestar servizo en torno ao mes de agosto.
“En
definitiva, un plan de transporte moderno e axeitado á realidade do seu uso,
cun documento positivo para os traballadores, para os usuarios e para toda
Galicia: para os preto de 5.000 traballadores do sector, porque blinda as
cláusulas sociais pactadas o ano pasado cos sindicatos UGT e CCOO; para os
usuarios, porque ademais da mellora das liñas, renóvase unha frota de entre
2.500 e 3.000 autobuses; e para Galicia, porque supón avanzar na vertebración
do territorio”, concluíu, o titular da Xunta.
Si desexa facer algún comentario poder enviar un correo a celso.delgado@congreso.es
Recibirá resposta.
