Isto plasmaríase, segundo explicou, en que “afrontemos
todos xuntos, Goberno, grupos parlamentarios, grupo de expertos designado polos
propios grupos parlamentarios e membros do servizo contra incendios” este
problema.
O conselleiro animou a todos a acadar un gran consenso
sobre o particular, de forma que “teñamos a suficiente altura de miras para
cumprir co mandato que nos deron os cidadáns que nos votaron: poñernos de
acordo na solución dos seus problemas”, co obxecto de que non se empregue o
lume como ferramenta partidista, remarcou. Fíxoo nunha comparecencia a petición
propia para explicar os pormenores do Plan de prevención e defensa contra os
incendios forestais de Galicia, Pladiga 2019.
Así, José González salientou as principais novidades
desta planificación anual, entre as que citou a posta en marcha dun teléfono
gratuíto e confidencial de denuncia anónima para fomentar a colaboración cidadá
fronte os incendiarios. Avanzou que o número deste servizo telefónico será o
900 815 085 e que estará operativo na época de alto risco de incendios.
Outros aspectos destacados do Pladiga, tal e como
sinalou o conselleiro, teñen que ver co uso de tecnoloxías para a loita contra
o lume e con melloras organizativas. Así, falou do emprego de drons tanto para
as tarefas de vixilancia e detección como de apoio na extinción e investigación
dos incendios. Por outra banda, salientou que se mellora tamén a vixilancia
fixa, coa incorporación de 30 novas cámaras de última xeración, que se suman ás
88 xa instaladas na Rede de videovixilancia forestal, polo que se disporá dun
total de 118 repartidas por todo o territorio forestal galego. En canto aos
medios e ao persoal, explicou José González, serán máis de 7.000 as persoas
implicadas no operativo, contabilizando as da propia Xunta, da Administración
do Estado e dos concellos, apoiadas por unha trintena de medios aéreos e por
360 motobombas, entre outros medios.
Mellora da prevención
Mellora da prevención
Nesta comparecencia, José González deu conta dos
diferentes traballos desenvolvidos pola Xunta para mellorar a prevención dos
incendios. Entre eles, puxo en valor o desdobramento da antiga Dirección Xeral
de Ordenación Forestal en dúas direccións xerais, unha centrada na
planificación do monte e outra na súa defensa fronte o lume.
Neste contexto, o titular de Medio Rural explicou
avances como a elaboración dos plans de ordenación forestal dos distritos que,
dixo, comezarán neste mesmo 2019. Tamén, trasladou a situación da revisión e
procura de consenso en torno ao Plan Forestal de Galicia, que –indicou–
“traeremos a este Parlamento antes de que remate este ano” ou a posta en marcha
do Inventario Forestal da nosa comunidade.
Cara o futuro inmediato, en materia lexislativa, o
conselleiro lembrou que elaborará unha nova lei de prevención e extinción de
incendios de Galicia. Neste aspecto destacou que se terán en conta todas as
achegas dos membros do servizo de loita contra incendios forestais, cos que
precisamente o conselleiro veu mantendo xuntanzas para coñecer de primeira man
as súas inquedanzas e abordar posibles melloras en todo o dispositivo. Tamén se
contará coas achegas que faga o grupo de expertos.
Así, José González adiantou ademais que a prevención
estratéxica se centrará en aspectos como a súa integración na ordenación do
territorio, a potenciación das devasas fronte o lume ou o incremento do tamaño
das franxas de protección, en determinadas áreas, para garantir a súa
efectividade. A maiores, o conselleiro sinalou que se analizará o comportamento
pasado dos incendios nas zonas de máxima incidencia, para anticiparse ao seu
desenvolvemento futuro e cuadricularase o territorio galego para, no caso de
grandes incendios, “ter claro onde esperalos para poder paralos”.
O conselleiro debullou tamén o acordo con Seaga e a
Fegamp para a protección das aldeas que, lembrou, está dotado con 28 millóns de
euros de fondos propios da Xunta en catro anos. Nesta liña, destacou que hai
case 200 concellos adheridos e fixo un chamamento aos que faltan para que se
incorporen.
Servizo único, público e versátil
Por último, José González insistiu na súa defensa dun
servizo único, público, profesional e versátil de loita contra os lumes
forestais. Nesta liña salientou a creación de 548 novas prazas de persoal
laboral, o incremento progresivo do tempo mínimo de traballo das brigadas de
reforzo, que pasaron de traballar tres meses ao ano en 2017 a facelo seis meses
de xeito gradual no 2020 e o reforzamento da formación cun plan adaptado ás
necesidades dos seus traballadores.
En relación coa versatilidade e a profesionalidade, o
conselleiro fixo fincapé na importancia de manter o alto nivel na extinción e
de traballar tamén moito máis na prevención.
Recibirá resposta
Recibirá resposta
