Asisto onte na Santa Igrexa Catedral de Ourense ao tradicional concerto de Nadal da Coral DE RUADA. Deu a benvida o
Deán, Don José Pérez Domínguez e tamén pronunciou unas palabras de agradecemento o Bispo D.
Leonardo Lemos Montanet.
Tivemos, centos de ourensáns e visitantes da cidade, ocasión de desfrutar dunha magnífica actuación da Coral neste templo incomparable e tendo como fondo o impresionante retablo maior que preside a imaxe da Virxe da Nosa Señora da Asunción.
Escoitamos un axeitado programa integrado por cantos de Nadal e Reís da
polifonía universal (Franz Xaver Gruber, Georg Friedrich Händel, Gabriel Olaizola) vilancicos e panxoliñas populares
e de autores – poetas e músicos – que tiveron e mesmo teñen ainda algúns deles
estreitos vínculos con Ourense e dun xeito especial con DE RUADA: Antonio
Jaunsarás, José Fernádez Vide, Camilo Andrade, Xosé Ramón Estévez, Serafín
Marqués, o actual director e outros.
Salientaría moitos momentos, pero
citarei a magnífica voz do solista Pedro Gómez Nieves, interpretando en galego
a coñecida canción vasca “Aurtxoa Seaskan”.
E tamén a cantiga popular recollida en Graíces, A Peroxa por Anxo Fernández “Noites de Ruada” e composta polo director Xoan Antón Vázquez, que cantando "o
meniño lindo", di:
“E tamén hei de pedirlle dúas cousas polo menos, moita paz para a nosa
España e un recuncho alá no ceo”.
Gracas e parabéns á todos os integrantes desta centenaría Coral, orgullo de
Ourense, comezando polo presidente Samuel Lago Fernández.
E que se cumpra a petición que fixeron onte: ”Pedimoslle ao neno que nos siga
a protexer, como fixo até agora, para que estes cen anos se prolonguen en
moitos anos máis”
