Hoxe a conselleira de Educación, Universidade e Formación Profesional, Carmen Pomar, anunciou a contratación de arredor duns 1.000 novos docentes que se incorporarán ao sistema educativo galego este curso, entre as novas contratacións para atender aos desdobres de aulas e os dos programas de reforzo educativo.
En concreto trátase de 240 novos mestres que se van
contratar para atender ás 158 novas unidades (grupos de clase) en Infantil e
Primaria; outros 543 docentes de apoio (221 para Primaria e 322 para ESO)
contratados a través do Programa ARCO de reforzo educativo; e unha contía aínda
sen concretar de docentes para Secundaria, Bacharelato e FP (pendentes do peche
de matrícula en setembro logo das probas de recuperación); que fan un total
estimado que se achega ao millar de novos profesores.
Nunha visita ao CPI Cova Terreña (Baiona), a
conselleira tamén explicou que, a día de hoxe, Galicia opta pola
presencialidade nas aulas con todas as medidas de seguridade, aínda que hai que
estar atentos á evolución da pandemia e ao que diten as autoridades sanitarias.
“Hai que combinar a seguridade sanitaria cos obxectivos educativos básicos que,
sobre todo en Infantil e Primaria, teñen moito que ver coa interacción
escolar”, polo que “a presencialidade é fundamental, sobre todo para os máis
pequenos, xa que a interacción forma parte da filosofía pedagóxica e da
metodoloxía didáctica”, abondou a conselleira.
Polo tanto, o Protocolo -presentado o pasado mes de
xullo- vai estar en constante revisión e “poder xurdir modificacións, xa que a
situación sanitaria varía”. Precisamente neste contexto de actualización
enmárcase a proposta do uso permanente de máscaras por parte dos nenos nas
aulas, que Galicia elevará a Conferencia de Presidentes anunciada polo Goberno
do Estado.
Carmen Pomar tamén anunciou que o seu departamento xa
ten ultimado o Plan de Acollida de Saúde Emocional, elaborado por expertos
médicos, que é unha guía de apoio ao alumnado, ás familias e aos docentes para
afrontar o inicio dun curso no que, segundo dixo, “é necesario o reforzo
curricular e o apoio emocional”.
Outra das liñas de actuación da Consellería que se ve reforzada é a formación do profesorado desde principios de setembro, tanto no ámbito da xestión dos recursos tecnolóxicos, como a formación específica para os 4.000 integrantes dos equipos covid dos centros escolares, esta última impartida por expertos do Servizo Galego de Saúde.
Na visita ao CPI Cova Terreña (Baiona), Carmen Pomar
comprobou a organización que está levando a cabo o equipo directivo no que
atinxe ao inicio da actividade académica así como no que atinxe aos servizos
complementarios, como é o caso do comedor escolar, que xestiona a Anpa do
centro.
Pomar loou o traballo desenvolvido a este respecto de
acordo co Protocolo de adaptación ao contexto da covid 19 nos centros de Ensino
non Universitario de Galicia para o curso 2020-2021, elaborado polas
Consellerías de Educación e de Sanidade; e reiterou que o obxectivo co que
traballa o seu departamento é cun inicio de curso coa máxima normalidade
posible dentro do contexto actual e, por tanto, facendo fincapé en todas as
medidas de seguridade hixiénicas e sanitarias que establece o propio Protocolo.
No que atinxe ao servizo de comedor escolar, cómpre
lembrar que as normas establecidas no Protocolo da Xunta son as mesmas para
todos os comedores independentemente de que o xestor do servizo sexa a propia
Consellería, os Concellos ou as Anpas, como é o caso do CPI Cova Terreña.
Precisamente neste centro -que aglutina a nenos das
etapas de Infantil, Primaria e ESO-, a conselleira fixo un especial
recoñecemento ao traballo dos integrantes da Anpa do centro para ter todo xa
ultimado de cara ao inicio do curso no que respecta a cuestións organizativas
(de distribución de alumnado) como de hixiene, limpeza e desinfección, na liña
do establecido no Protocolo.
