Afirma que “Os traballos correspóndense coa 2ª fase da posta en valor desta zona da cidade e contan cun investimento de máis dun millón de euros.
Esta actuación, cun prazo de execución de 9 meses, abarca a conservación da propia ponte e a mellora da contorna da Capela dos Remedios, acondicionando e ampliando o acceso á entrada lateral da ermida e substituíndo a varanda.
Os traballos potenciarán as conexións peonís desde os distintos puntos da cidade cara a este conxunto patrimonial, coidando o mobiliario e creando un espazo para o lecer.
A intervención inclúe a liberación da zona que hoxe ocupa o parque de skate, construíndo un novo no Barrio do Couto, que contará cun circuíto de bicicletas (pump track) executado en zahorra e capa de rodadura asfáltica.
O proxecto permitirá dotar a cidade de Ourense dunhas instalacións axeitadas para unha práctica máis cómoda e segura desta actividade deportiva. O traslado deste parque tamén posibilitará acadar unha contorna ampla e aberta que servirá de antesala á Capela dos Remedios e como conexión coa Ponte.
Ademais habilitarase un miradoiro como novo atractivo turístico da cidade, desde o que poder observar o río Miño, a Ponte Vella e a Capela dos Remedios.
As obras iniciadas, enmarcadas no convenio de colaboración entre a Xunta e o Concello de Ourense, veñen a continuar as xa realizadas nesta infraestrutura nunha 1ª fase, sumando unha achega global de 1,5 millóns de euros.
