A Estratexia
Retorna aprobouse en 2018 con tres ideas básicas, o dereito dos galegos a
retornar, o impulso á demografía da comunidade autónoma e a mellora da nosa
competitividade económica. O obxectivo era axudar a conseguir o retorno de
20.000 galegos, unha cifra que se superou con creces, e que, de non ser pola
pandemia da COVID-19 sería moito maior.
Precisamente, foi a
crise sanitaria a causa que motivou a necesidade de prorrogar a Estratexia ao
longo de 2021, e a se está a traballar na nova estratexia 22-25 que vai
impulsar novas liñas baseándose nos resultados conseguidos e na experiencia
adquirida.
O balance da
Estratexia Retorna 2020 recolle a posta en marcha de 52 medidas, directas e
transversais, que se ampliaron ata as 64, e que axudaron a que os galegos que
residían no exterior tomaran a decisión de retornar, ben para estudar ou buscar
un emprego, ou ben para poñer en marcha en Galicia o seu propio negocio.
Estas medidas
facilitaron o crecemento da poboación da comunidade autónoma e un saldo
migratorio positivo en 2019 de máis de 17.000 persoas. Tamén permitiu o seu
rexuvenecemento, con máis de 12.700 retornados de menos de 45 anos, é dicir, o
58,70% do total.
En 2020, a idade
media do conxunto de persoas que chegaron a Galicia para fixar a súa residencia
foi de 36,9 anos. Na mesma liña se manifestaron os datos educativos con máis de
10.000 alumnos procedentes do estranxeiro que forman parte dunha familia
retornada que ingresaron no sistema educativo galego.
Entre os datos
extractados deste balance cabe destacar que se creou unha única canle de
información e asesoramento dixital, pioneira en España, o Portal Retorna, que
superou xa as 100.000 visitas, así como a Oficina Integral de Asesoramento e
Seguimento ao Retorno, descentralizada nas catro provincias, desde da cal xa se
fixo o seguimento personalizado a máis de 6.500 familias.
Dentro das medidas
directas postas en marcha pola Secretaría Xeral da Emigración cabe aportar que
se destinaron 4,6 millóns de euros ás familias retornadas para o seu proceso de
integración en Galicia, colaborando así con 6.187 persoas, das cales, o 35%
contaban con fillos menores de idade, ás cales habería que engadir outros 2,2M€
en 2021.
Destináronse tamén
3 millóns de euros para apoiar a 500 emprendedores retornados no impulso do seu
negocio, o que mobilizou un investimento de 25 millóns de euros que repercutiu
sobre a economía galega.
No período
2018/2020 ofertáronse 700 bolsas formativas para que as mozas e mozos galegos
residentes no exterior puideran estudar un mestrado ou un ciclo de formación
profesional superior, aos que se destinaron 6M€. Se temos en conta o ano 2021,
o orzamento destinado a estas axudas ascendeu a case 8 millóns de euros,
incrementándose a oferta ate as 900 prazas.
Da análise da
situación dos alumnos participantes nas primeiras convocatorias podemos afirmar
que máis do 70% están a residir e traballar en Galicia.
A Estratexia
Retorna 2020 ten coma obxectivo loitar contra o reto demográfico, un problema
non só galego senón tamén europeo. O apoio ao regreso dos galegos o exterior e
dos seus descendentes permite rexuvenecer a sociedade galega, dotala de
experiencias enriquecedoras e potenciar as iniciativas empresarias e económicas
de Galicia, traballando así por conseguir unha vantaxe competitiva da nosa comunidade.
