Segundo explicou Feijóo, “o Concello comprométese a achegar ao Sergas 5,2 millóns de euros para exencionar o IBI en favor do novo hospital de Ourense durante os próximos seis anos”.
A Xunta aceptou esta modalidade de colaboración co Concello de Ourense e salientou a importancia que ten que os gobernos municipais se impliquen nos procesos de modernización das infraestruturas hospitalarias, tal e como fixeron os concellos de Pontevedra e da Coruña, nas construcións do Gran Montecelo e do Novo CHUAC.
Un convenio que contribúe a desenvolver o compromiso co futuro da sanidade pública en Ourense, tal e como anunciou o presidente da Xunta o pasado 2 de xullo, ao dotala cun investimento de case 120 millóns de euros para ampliar o seu complexo hospitalario e, ademais, construír un centro integral de saúde na cidade.
As obras licitáronse en xullo por 52,5 millóns de
euros e está previsto que se adxudiquen antes de rematar o ano. Suporán a
construción dun novo edificio entre o Hospital de Cristal e o Materno-Infantil
e a remodelación deste último.
Máis polo miúdo, Feijóo detallou que o novo edificio
contará con 280 camas de hospitalización convencional, 38 para ingresos
pediátricos e 56 de hospitalización obstétrica; un área de Neonatoloxía con UCI
pediátrica; urxencias pediátricas e obstétricas; un servicio de Radioloxía e
unha área de diálise.
Logo de lembrar que os orzamentos da Xunta para 2022
contemplan 21,8 millóns de euros para este hospital, Feijóo puxo en valor que
as obras no CHUO permitirán ampliar un 47% a súa superficie -respecto a de hai
doce anos-.
Deste xeito, “triplicaremos o espazo da UCI, crearemos
unha nova unidade de medicina nuclear e construiremos un novo edificio
ambulatorio e un novo edificio administrativo”, detallou Feijóo.
A maiores, haberá 1,5 M€ para comezar as obras do
Centro Integral de Saúde no centro da cidade. “O obxectivo en Ourense é
investir 120 millóns de euros”, concluíu Feijóo.
