Parabéns á Fundación San Rosendo que cumple hoxe 30 anos

Decátome por  twitter que a Fundación San Rosendo cumpre hoxe  30 anos. E como di no seu tweet “centrados en promover vidas activas e saudables, dar vida de calidade aos anos e proporcionar unha atención personalizada. Unha tarefa que desenvolvemos día a día coa mesma ilusión que fai tres décadas, celebrando a vida e dando vida aos anos.”

Inmediatamente respondín por ese medio dixital, celebrando a noticia e dando un sentido parabén á Fundación polo “importantísimo labor asistencial con carisma cristián, potenciado o emprego no medio rural e contribuindo o desenvolvemento de Ourense e de Galicia”

Lembro agora como hai casi cinco anos, o 2 de marzo de 2017, participaba nas actividades programadas para conmemorar o 25 aniversario da Fundación San Rosendo. Asistía en primeiro lugar a unha eucaristía na catedral de Ourense, presidida polo titular da diocese D. Leonardo Lemos que concelebró con bispos e arcebispos galegos e de Astorga, ademais do cardeal arcebispo de Madrid, Carlos Osoro. 

E despois acudimos a Laias a un xantar e finalmente pola tarde asistín no Teatro Principal a unha conferencia do cardeal-arcebispo de Madrid Carlos Osoro.

O que foi bispo de Ourense dixo entón e que "O labor asistencial realizado por Fundación San Rosendo é excepcional, foi copiada mesmo noutros países e agora cumpre 25 anos de humanismo cristián, de traballar polos que non teñen nada; aqueles que mesmo non son rendibles para outros.

2-3-2017

Osoro eloxiou o labor de Benigno Moure, "un home tan excepcional como o é a súa obra e ao que quero e admiro" e engadiu "acostumo a dicirlle a Don Benigno que el repite a a historia de San Pablo cando escribe cando non fixo outra cousa na súa vida que traballar polos pobres".

Hoxe que chega o trinta aniversario procede ratificar estas palabras e engadir moitas máis para gabar o labor inmenso da Fundación San Rosendo, que ten a súa orixe en Cáritas Diocesana de Ourense (1972) onde un grupo de veciños de Ourense, liderados polo sacerdote Don Benigno Moure, desenvolvían iniciativas de axuda aos colectivos máis desfavorecidos da provincia.

Tras esta experiencia, en 1992, o Bispado de Ourense constitúe a Fundación San Rosendo con fins xerais de interese galego para desenvolver funcións de asistencia social. A Fundación toma o nome de San Rosendo, en referencia ao bispo ourensán que loitou pola xustiza, o desenvolvemento e o benestar desta provincia.

Desde o seu nacemento envorcouse en dar solución ás necesidades máis perentorias da sociedade galega e dos colectivos máis débiles: nenos, maiores e persoas con discapacidade.

A Fundación dispón de 73 centros asistenciais entre residencias de maiores, apartamentos tutelados, centros de discapacidade e de rehabilitación; ademais de tres centros de augas mineromedicinales, repartidos polas catro provincias galegas. O 85% destes centros atópanse en concellos rurais. 

A Fundación conta con preto de 3.846 prazas asistenciais, e ten 1.942 traballadores.

O obxectivo prioritario da Fundación San Rosendo é prestar axuda e benestar aos colectivos máis desfavorecidos de Galicia, desde unha perspectiva de integración e participación activa na sociedade e, ao mesmo tempo, xerar valor engadido na contorna no que se integran os centros asistenciais.

O meu recoñecemento máis sinceiro o traballo desta Fundación que dirixe José Luis Gavela e unha total admiración polo fundador, o cura Don Benigno Moure.