Explicou que a contratación destes profesionais permitiu
poñer en marcha unidades de prevención do suicidio como a de Ourense, noutras 5
áreas sanitarias galegas, así como hospitais de día infanto-xuvenís noutras
dúas áreas máis -Vigo e Santiago-; contar con psicólogos clínicos de enlace de
primaria e hospitalaria nas sete áreas; e ampliar a hospitalización a domicilio
de saúde mental en tres áreas sanitarias -Ourense, Santiago e Pontevedra-.
Así mesmo, destacou o reforzo do programa sociosanitario
para as residencias e a creación de cinco novas unidades ambulatorias: tres de
adultos (en Ordes, Oleiros e Tui); e dúas infanto-xuvenís (na Coruña e en
Vigo). Todas elas multidiciplinares, é dicir, con psiquiatría, psicoloxía,
enfermaría especialista e traballo social.
Ao
longo da súa intervención, Feijóo recordou que nos orzamentos deste 2022 os
fondos para saúde mental aumentaron 4,4 millóns de euros. Por unha banda, para
seguir aumentando progresivamente as prazas en centros de rehabilitación, pisos
protexidos ou centros residencias; para incrementar o apoio ás entidades
sociais que traballan coa saúde mental; e para seguir incorporando persoal, con
outras 43 novas prazas este ano, con fin de poñer en marcha programas centrados
na prevención e na atención da mocidade, o colectivo máis afectado pola
pandemia na saúde mental.
Nesta
mesma liña, confirmou que este ano poranse en funcionamento dous hospitais de
día infanto-xuvenís máis -en Lugo e na Coruña-; e iniciarase a obra para dotar
á Comunidade dunha segunda unidade de hospitalización para pacientes agudos de
saúde mental infantís e xuvenís, que estará no Hospital Álvaro Cunqueiro. Unha
unidade que xunto á de Santiago permitirá duplicar as capacidades de Galicia
para ofrecer recursos de hospitalización aos pacientes agudos menores de 16
anos.
Na
visita ao CHUO, o presidente do Goberno galego coñeceu a actividade das actuais
unidades de saúde mental pero tamén das que se acaban de poñer en marcha no
complexo hospitalario, nos últimos meses, como: un hospital de día
infanto-xuvenil e a unidade de psicoxeriatría.
Dúas unidades para atender a menores con trastorno alimentario ou con trastorno mental grave e reforzar o coidado da saúde mental dos maiores hospitalizados, ás que se unen outros servizos, como a incorporación de novo persoal ao programa de hospitalización a domicilio psiquiátrico. “E Incorporamos tamén persoal de psiquiatría ao programa sociosanitario que presta atención ás persoas que viven nas residencias de maiores.
Ademais de crear dous postos de
psicoloxía de enlace, un deles encargado de desenvolver o plan de apoio
psicosocial para o noso persoal sanitario”, engadiu, precisando que, en total,
a área de Ourense conta con 12 novos profesionais de saúde mental incorporados
e está pendente da cobertura doutras catro vacantes.
