As imaxes de onte do incendio de Carballeda de Valdeorras reactivado por mor dun cambio de ventoeran terribles. Este incendio forestal orixinouse o xoves pasado e afecta unha superficie estimada de 2.400 hectáreas. No seu control levan participado en total 7 técnicos, 28 axentes, 63 brigadas, 32 motobombas, 3 pas, 8 avións e 7 helicópteros. Neste lume participa a Unidade Militar de Emerxencias (UME).
Tamén preocupa e moito o incendio de Folgoso do Courel, parroquia de Vilamor, que rolda as 2.500 hectáreas segundo as últimas estimacións. Este incendio permanece activo desde o xoves pasado. No seu control traballaron ata o momento 2 técnicos, 27 axentes, 40 brigadas, 25 motobombas, 1 pa, 1 unidade técnica de apoio, 7 avións e 9 helicópteros. Neste lume tamén despregou efectivos a Unidade Militar de Emerxencias (UME), que despregou efectivos na zona.
Tamén salientar o incendio no concello ourensán de Oímbra, que entrou desde Portugal pola parroquia de Videferre, ás 15,57 h. de onte, e afecta unhas 350 ha provisionais. E o de Vilariño de Conso, parroquia de Pradoalbar. Segundo as últimas estimacións, afecta unha superficie de 800 hectáreas provisionais dentro do parque natural do Invernadeiro. No seu control traballaron ata o de agora 2 técnicos, 12 axentes, 37 brigadas, 13 motobombas, 3 pas, 4 avións e 8 helicópteros.
Salientar que a Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais pode ser consultada na conta aberta de twitter: @incendios085.
