“Transcorridos seis meses desde o seu nomeamento, parece unha misión imposible manter un encontro coa persoa designada polo Goberno central para levar os asuntos relacionados co Corredor Atlántico, o que consideramos un evidente desprezo a Galicia e pon de manifesto que a súa designación foi unha fraude”, manifestou o portavoz popular de Infraestruturas, José Manuel Balseiro.
Na súa intervención, Balseiro considerou que o novo Comisionado do Corredor Atlántico “non quere recibir aos responsables das comunidades autónomas porque non xestionou os fondos europeos para financiar este proxecto” e lembrou que “con tan só un día de diferenza pasamos de escoitarlle dicir que ‘as obras do Corredor Atlántico faranse goberne quen goberne’ a ter que recoñecer que ‘non haberá fondos europeos para finalizalas’”.
“Para Galicia é unha pésima noticia a exclusión do Corredor Atlántico do reparto de fondos europeos para o ano 2023, que confirman os nosos temores de que o Goberno de Pedro Sánchez segue parado e sen facer nada para impulsar esta infraestrutura estratéxica para Galicia”, lamentou.
O portavoz popular afirmou que “tanto o Goberno central como o Comisionado do Goberno para o Corredor Atlántico deben das explicacións do por que ningún proxecto desta infraestrutura en Galicia e en todo o noroeste vai recibir fondos europeos na convocatoria que vén de resolverse”. Neste sentido, explicou que “o único que sabemos é que a Unión Europea vai destinar este ano 6.300 millóns de euros a impulsar a Rede Europea de Transportes, dos que 250 millóns serán para España pero nin un céntimo para Galicia nin para o noroeste”.
Diante desta situación, José Manuel Balseiro volveu reclamar unha reunión do Comisionado do Corredor Atlántico coas comunidades autónomas de Galicia, Asturias e Castela e León “con carácter de urxencia, porque somos conscientes do moito que está en xogo”. “Temos unha responsabilidade especial e a obriga de reclamar dun xeito máis belixerante e decidido que o Corredor Atlántico de mercadorías sexa unha realidade, e só será posible se traballamos todos xuntos por conseguilo”, rematou.
O Corredor Atlántico
O Corredor Atlántico é a conexión multimodal que conecta Portugal, España, Francia, Alemaña e Irlanda e dá servizos a persoas e mercadorías polo que é clave para o desenvolvemento loxístico e conecta nodos urbanos. Está composto polos diferentes modos de transporte: estrada, ferrocarril, portuario, aéreo, fluvial e multimodal polo que, ademais dos roteiros ferroviarios e viarios, inclúe os portos, aeroportos, estacións intermodais e cidades máis importantes.
Ao seu paso por España, o Corredor Atlántico comprende once Comunidades Autónomas (Asturias, Galicia, Castela e León, País Vasco, Navarra, Aragón, Estremadura, Madrid, Castela A Macha, Andalucía e Canarias), e no seu traxecto ferroviario incorpora máis de 5.300 quilómetro, segundo a última proposta de ampliación.
Así, o seu desenvolvemento, ten e terá un impacto directo e moi positivo sobre as once autonomías, que representan a máis do 65% da poboación española. Se o analizamos a través un prisma económico, o Corredor Atlántico atravesa e vén impulsar Comunidades Autónomas que xeran actualmente ao redor de 778.000 millóns de euros do noso Produto Interior Bruto (PIB).
O Corredor conecta Portugal co resto de Europa, a través de España. Os pasos fronteirizos son fundamentais para a consecución dunha rede europea.
