A conselleira de Infraestruturas e Mobilidade, Ethel
Vázquez, compareceu esta mañá na Comisión 3ª de Economía, Facenda e Orzamentos do Parlamento galego para presentar as contas do seu departamento para 2024, que se incrementan un 2,4 € e chegan ata os 592,5 millóns de euros, 14 millóns de euros máis que no presente exercicio. Unhas contas que, en palabras de Ethel Vázquez, demostran a vocación “social e ambiental” da Xunta, tamén desde o eido das infraestruturas.
Dixo que o departamento autonómico de Infraestruturas e Mobilidade
xestionará, ademais, o vindeiro ano outros 165 millóns de euros de investimento
consignados nas contas da Consellería de Sanidade pero de cuxa execución se
encargará a Axencia Galega de Infraestruturas. Trátase das obras de ampliación
e mellora dos grandes complexos hospitalarios: o Hospital de Ferrol, o Novo
CHUAC, o Hospital de Ourense, o Hospital Clínico de Santiago e o Novo
Montecelo; ademais da construción do Centro Integral Olimpia Valencia de Vigo,
e novos centros de saúde nas catro provincias, como o de Abegondo, o da Milagrosa
de Lugo, o de Boborás, o de Muíños ou o de Vilagarcía de Arousa, entre outros.
Investimentos centrados
en catro obxectivos estratéxicos
Tal e como detallou Ethel Vázquez na súa
comparecencia, a liña de acción da Consellería para 2024 centrarase en catro
obxectivos estratéxicos. Por unha banda, traballar por unha Galicia máis
conectada e sostible, con medidas sociais como
a conxelación das peaxes ou a gratuidade do transporte para os menores
de 21 anos, unha iniciativa á que se incorporarán en xaneiro, os maiores de 65.
Neste obxectivo enmárcanse os investimentos destinados ao transporte público, a
vertebrar o territorio con novos quilómetros de vías de altas prestacións e para
o bo mantemento da rede actual de estradas autonómicas, así como as medidas
encamiñadas ao fomento da mobilidade sostible.
O segundo eixe de traballo busca facer de
Galicia un polo loxístico do sur de Europa, aproveitando as potencialidades
xeográficas da comunidade, como porta de entrada desde o Atlántico en Europa, as
alianzas estratéxicas co veciño Portugal e con toda Hispanoamérica e as
autonomías do noroeste de España. Neste sentido, a incorporación da Comunidade
ao trazado do Corredor Atlántico de Mercadorías representa, en palabras da
conselleira, unha oportunidade única para impulsar Galicia como nodo loxístico
internacional.
O terceiro obxectivo no que se centran as
contas da consellería de 2024 é situar Galicia como referente en auga e cambio
climático, toda vez que, resaltou a conselleira, xa é unha referencia estatal en
apoio aos concellos nas súas competencias de abastecemento, saneamento e
depuración. Galicia aspira agora a consolidar tamén unha posición de vangarda
na xestión da auga no contexto do cambio climático, e estar mellor preparada
fronte a episodios de seca e inundacións.
En cuarto lugar, a conselleira apuntou que
os Orzamentos para 2024 reflicten a vontade de que Galicia sexa, tamén unha
Comunidade modelo na construción de novas infraestruturas sanitarias que
optimicen a prestación dos servizos da sanidade pública.
Con estes obxectivos, a Axencia Galega de
Infraestruturas volverá ser o vindeiro ano, o departamento da Consellería con
maior orzamento, ao manter practicamente igual investimento que no presente
exercicio, 283 millóns de euros.
A Dirección Xeral de Mobilidade incrementa o
seu presuposto ata os preto de 164 millóns, o que significa un 31,6% máis que en
2023. Este centro directivo absorbe os fondos europeos do Mecanismo de
Recuperación e Resiliencia dedicados ao financiamento de infraestruturas dunha
mobilidade sostible, que este ano estaban consignados nas contas da Secretaría
Xeral Técnica, que en 2024 verá minorado, como consecuencia, o seu orzamento
ata os 8 millóns.
Augas de Galicia, pola súa banda, contará cun
orzamento de 140 millóns de euros, que permitirán seguir coa colaboración
técnica e financeira cos concellos para reforzar os sistemas de saneamento e
depuración e promovendo actuacións que garantan o abastecemento de auga,
incrementando a resiliencia fronte a situacións de seca e tamén con actuacións
para reducir o risco de inundacións, nun contexto de cambio climático.
Conxelación de peaxes e
gratuidade para os maiores de 65 anos
Na
aposta por unha Galicia conectada e sostible e por unha mobilidade máis social,
as contas do vindeiro ano reservan unha partida de 5,5 millóns de euros para
conxelar as tarifas nas autoestradas autonómicas AG-55 e AG-57, un 15% máis que
neste 2023.
Tal e
como lembrou a conselleira, por segundo ano consecutivo, a Xunta conxelará o
prezo das peaxes das autoestradas autonómicas, minorando sobre os usuarios o
impacto que suporía o IPC, unha medida que ten a súa orixe no ano 2022, cando
xa se limitou a suba á metade.
Ese
investimento de 5,5 M€ permitirá, ademais, manter o paquete de bonificacións
que se foi ampliando desde o ano 2010 e que se aplica hoxe a usuarios
frecuentes, a familias numerosas e a viaxes en horario nocturno. Ethel Vázquez
detallou que esta medida permitirá beneficiar aos preto de 27.900 usuarios
diarios destas autoestradas, que seguirán a ser as máis baratas de España.
Transporte público e vertebración territorial
O
marcado carácter social das contas da Consellería tamén se verá reflectido
nunha medida nova e pioneira: a gratuidade do transporte público da Xunta para
os maiores de 65 anos. Ethel Vázquez resaltou que, desde o vindeiro 1 de
xaneiro, os 52.720 maiores de 65 que xa dispoñen da Tarxeta de Mobilidade de
Galicia (TMG) poderán desprazarse gratis no autobús interurbano da Xunta, no
barco na ría de Vigo, e no Feve na área de Ferrol.
A
conselleira avanzou o impacto positivo desta medida, á que se poderán acoller
todos os maiores de 65 anos, simplemente solicitando a Tarxeta de Mobilidade de
Galicia nunha sucursal de Abanca, o que lles permitirá realizar ata 60 viaxes
ao mes de balde nalgunha das máis 3.500 liñas de transporte público da Xunta.
Os
maiores de 65 anos sumaranse, deste xeito, á gratuidade da que xa desfrutan
preto de 160.000 mozos galegos menores de 21 anos coa tarxeta Xente Nova, que lles
está a permitir aforros nos seus desprazamentos de ata 1.000 euros ano.
Vázquez
Mourelle referiuse ao esforzo que a Xunta vén facendo polo transporte público,
para garantir servizos de autobús interurbano eficientes e mellor adaptados ás
necesidades da xente. Incidiu en que no vindeiro exercicio serán 100 millóns os
que se destinarán a este fin, dos cales 9 serán para que os menores de 21 anos
poidan seguir viaxando de balde e 5 millóns para ampliar a gratuidade aos
maiores de 65 anos coa TMG, sendo Galicia, de novo, pioneira.
A
aposta polo transporte público tamén se verá reflectida na mellora dos
equipamentos e servizos. Tal e como indicou a conselleira, en 2024 serán máis
de 20 os millóns que se investirán para seguir sumando novas cidades á
intermodalide: 25 millóns reservados para avanzar nas obras da estación de
autobuses intermodal da Coruña; 5,8 millóns para a de Lugo, cuxas obras se
licitarán este outono e estarán en execución no vindeiro ano; e para avanzar na
de Ferrol, que precisa da implicación do Goberno de España.
A
vontade de avanzar na vertebración e a cohesión territorial motivan que as
contas da Consellería de Infraestruturas e Mobilidade reserven en 2024 unha
partida de 40 millóns de euros para a execución de vías de altas prestacións,
variantes e acondicionamento de estradas. Destaca o investimento de 1,5 millóns
de euros para a VAP Tui-A Guarda, na que este ano rematará o enlace coa A-55 e
o polígono de Areas; 4 M€ para a VAP da Costa Norte, para o treito da
AG-64-Sanguiñeira, con compromisos orzamentarios para os vindeiros anos por
importe de 39 millóns; tamén para a autovía da Costa da Morte a través da
execución da vía de altas prestacións Baio-Berdoias; para a VAP Brión-Noia; ou
para avanzar na segunda fase de conversión en autovía da VAP Nadela-Sarria.
A
partida máis importante, 10 millóns de euros en 2024 e partidas plurianuais por
importe de 55 millóns, será, tal e como confirmou Ethel Vázquez, para a
continuación da autovía á Estrada, nun primeiro treito entre A Ramallosa e Pontevea,
en Teo, cuxas obras se iniciarán este mesmo martes.
Vázquez
Mourelle remarcou que cando se poñan en servizo as actuacións que hoxe están en
obras ou en fase de planificación, máis do 85% da poboación galega estará a
menos de 15 minutos dunha vía de altas prestacións.
Paralelamente,
continuarase coa execución de variantes de estradas autonómicas ao seu paso por
núcleos de poboación: Carballo, Ribeira, Rolda Leste de Lugo e a circunvalación
Este de Ourense no treito Bemposta-N-525. Avanzarase, ademais, na mellora e
acondicionamento de distintas estradas autonómicas, como a mellora da LU-540,
da estrada Portomouro-Santa Comba, etc.
A
titular de Infraestruturas apuntou a importancia de manter tamén as estradas
existentes en boas condicións, para o que, as contas do próximo exercicio
incrementan o investimento destinado a este fin preto dun 8%, ata acadar os case
53 millóns de euros, para manter as vías en perfectas condicións e reforzar a
seguridade dos usuarios. Este investimento posibilitará continuar con programas
como o Plan de reforzos de firme, a conservación ordinaria e a vialidade
invernal, a Estratexia para a eliminación dos treitos de concentración de
accidentes ou o programa de control das pontes, obras de pasos, muros e noiros.
No
eido da mobilidade sostible, Vázquez Mourelle lembrou que, tras construír 250
quilómetros de sendas, o vindeiro ano impulsaranse novas actuacións cun
investimento de case 35 M€: coa construción do novos itinerarios peonís e
ciclistas a través do Plan de sendas de Galicia, que chegará a outras comarcas;
coa execución de grandes sendas metropolitanas, como as que unirán a cidade de
Ourense de norte a Sur e a que conectará O Milladoiro, a intermodal de Santiago
e San Caetano, na capital de Galicia. Ademais continuarase cos proxectos para
abril as cidades da Coruña, Ferrol e Vigo ao mar, con actuacións nas fachadas
marítimas en colaboración coas respectivas autoridades portuarias e, no caso de
Ferrol, iniciando unha nova colaboración co Concello para este mesmo fin, co
proxecto “Abrir Ferrol ao Mar”.
Os
Orzamentos da Consellería de Infraestruturas e Mobilidade para o vindeiro ano
permitirán completar a execución de aparcadoiros disuasorios nas contornas das
grandes áreas urbanas, como o de Domaio, en Moaña; o de Vilagarcía de Arousa; o
de Ribadumia; o de Nigrán; ou o da PO-546 en Pontevedra; o da avenida de
Breogán, en Lugo; ou o de San Xoán en Ferrol; así como na mellora das paradas
de autobús nas estradas autonómicas, mellorando a súa accesibilidade e
seguridade viaria, así como desde unha perspectiva de xénero.
A
titular de Infraestruturas puxo o acento nunha nova medida, pioneira, que se
comezará a desenvolver na vindeira primavera comezando pola Autovía do Morrazo.
Trátase da Estratexia de estradas verdes, para reforestar as marxes das vías de
altas prestacións autonómicas con frondosas autóctonas, que ten asignada unha
partida de 1,5 M€ en 2024. A modo de experiencia piloto, no vindeiro exercicio
prevense plantar 25.000 árbores na autovía do Morrazo, no ramal de Cangas e no
corredor Cangas-Aldán que actuarán a modo de cortalumes, contribuirán a
optimizar os traballos de conservación das marxes das vías e contribuirán a
reducir a pegada do carbono na estrada. Tal e como explicou Vázquez Mourelle, o
obxectivo da Xunta é desenvolver nos próximos dez anos esta medida nos preto de
500 quilómetros de vías de altas prestacións de titularidade autonómica cun
investimento global de 25 M€.
Áreas de estacionamento seguro
Para reforzar
a competitividade do sector do transporte de mercadorías, a Xunta investirá o
vindeiro ano en axudas á formación dos profesionais do transporte e no apoio
para a obtención do certificado de aptitude profesional (CAP). Ademais, Ethel
Vázquez avanzou a posta en en marcha unha liña novidosa, cun investimento de
650.000 €, que consiste na creación dunha área de estacionamento seguro para
camións no polígono de San Cibrao das Viñas e nas axudas para transformar os
aparcadoiros de tránsito existentes nas estacións de servizo nunha rede de
áreas de estacionamento protexido e seguro para camións. O obxectivo, indicou,
é crear un total de 250 prazas nas catro provincias en 2024.
Galicia, seguir sendo referente na xestión da auga
En
canto aos investimentos previstos polo organismo Augas de Galicia, Ethel
Vázquez incidiu en que irán orientados a coidar e preservar deste ben vital e
escaso, para continuar situando a Galicia en posición punteira en canto a apoio
aos concellos nas súas competencias municipais de saneamento, abastecemento e
depuración; e tamén referente na xestión climática da auga, para ser máis
resilientes para afrontar episodios de seca e escaseza de auga e de
inundacións.
Para
o apoio aos concellos nas súas competencias de depuración e saneamento, resérvanse
partidas por importe de 85 millóns de euros, con actuacións importantes para a
mellora do saneamento en Foz, Burela, Vilagarcía, Lalín ou Sada. Tamén, tal e
como referiu a conselleira, resérvanse partidas para contribuír á construción
de actuacións declaradas de interese xeral do Estado (depuradora da Silvouta,
en Santiago, e a de Ponteareas); para a liña de axudas para a realización de
auditorías nas redes de saneamento, para evitar verteduras e a entrada de augas
brancas; e tamén para reducir o risco de inundacións, como no río Anllóns, en
Carballo, ou nos ríos Miñor e Zamáns, en Gondomar, cuxas obras non se puideron
iniciar ata o momento polas dificultades postas polo Concello.
A estar mellor preparados fronte á seca e
ter garantidas reservas de auga destinaranse 23 millóns en 2024, con actuacións
para mellorar abastecementos municipais e medidas encamiñadas a aumentar as
garantías de existencia de recursos hídricos dabondo para cubrir as demandas de
abastecemento reservando os caudais ecolóxicos. Ethel Vázquez detallou que se
impulsarán medidas innovadoras, como a reutilización de auga con usos
industriais; a identificación de novas reservas de auga, como poden ser antigos
ocos mineiros; ou o impulso da interconexión dos grandes sistemas de abastecemento.
Concretou, ademais, que o vindeiro se lle dará continuidade á liña de
incentivos á mellora de traídas veciñais, aos plans de abastecemento autónomo
ou para a redución de perdas de auga na rede de abastecemento.
Como nova medida, Vázquez Mourelle referiuse
á creación da Escola da Auga, cun plan de formación continua para o persoal
técnico dos concellos, das empresas xestoras, enxeñerías, comunidades de
usuarios etc., de cara a garantir unha xestión profesionalizada deste recurso.
Ademais desenvolverase unha Estratexia para
acadar a neutralidade enerxética nas depuradoras de Galicia. Trátase dunha
medida que se aplicará en 70 depuradoras de augas residuais de máis de 10.000
habitantes e na que, segundo a conselleira, tamén Galicia será pioneira.
