Balseiro lembrou que “é a cuarta ocasión na que, a través dunha proposición de lei aprobada neste Parlamento galego para remitir ao Congreso, solicitamos a transferencia a Galicia da titularidade e competencias sobre a AP-9”. Deste xeito, considerou “positivo que as tres forzas políticas galegas con representación nesta Cámara concorden en que acadar esta transferencia é bo para Galicia e, polo tanto, constitúe unha reivindicación de país”.
XESTIÓN MÁIS XUSTA E MÁIS SENSIBLE
“Queremos unha AP-9 galega, aínda que en esencia esta autoestrada xa o é, porque o seu trazado transcorre integramente polo territorio de Galicia e vertebra toda a fachada atlántica, conectando cinco das sete cidades galegas”, indicou o portavoz popular. Así, explicou que o traspaso a Galicia “traduciríase nunha xestión máis xusta para os seus usuarios e máis sensible cos intereses das galegas e dos galegos, podendo decidir que obras son prioritarias e un mellor sistema de bonificacións, e non as vixentes que son insuficientes”.
José Manuel Balseiro tamén demandou unha AP-9 libre de cargas, para o que “unha das principais novidades desta lei reside en que a Administración do Estado dotará a Galicia dos medios económicos suficientes para ampliar as bonificacións e acometer as obras comprometidas aínda pendentes”.
O portavoz popular asegurou que “o PP está en disposición de avanzar e de garantir que votará a favor da Lei de transferencia da AP-9 a Galicia tanto hoxe, neste Parlamento, como no futuro cando se debata no Congreso”, polo que cuestionou a socialistas e nacionalistas galegos “se poden asumir este mesmo compromiso”.
“A pelota está no seu tellado, pero a verdade é que non confiamos nada na palabra do BNG e do PSdeG, porque a transferencia da AP-9 a Galicia xa foi un dos compromisos do pacto de investidura asinado en 2020 entre socialistas e nacionalistas galegos que non se cumpriu, pero que non tivo consecuencia algunha ata o punto de que o BNG volveu regalar os seus votos para a recente investidura de Pedro Sánchez, porque a mención sobre a transferencia da AP-9 desapareceu do acordo prevendo un novo incumprimento”, afirmou.
A XUNTA SEGUIRÁ DANDO A BATALLA POR UNHA AP-9 GALEGA E PIDE AO GOBERNO QUE ACLARE QUE PASARÁ O 1 DE XANEIRO COAS PEAXES
A conselleira de Infraestruturas e Mobilidade, Ethel Vázquez, asistiu hoxe ao debate e aprobación en Pleno da Proposición de Lei, para remitir ao Congreso dos Deputados, de transferencia da titularidade e competencias da AP-9 a Galicia.
Vázquez Mourelle subliñou que a AP-9 ten as peaxes máis elevadas do Estado, pese ás bonificacións, e a comezos deste ano 2023 as súas tarifas encarecéronse unha vez máis.
Neste sentido, instou ao Goberno a clarificar se vai adoptar unha medida similar á da Xunta, que conxela por segundo ano consecutivo as tarifas nas autoestradas autonómicas; ou se vai permitir un novo incremento derivado da suba do IPC e da suba extraordinaria do 1% polas obras.
A titular de Infraestruturas e Mobilidade lembrou que a Xunta leva máis de 14 anos defendendo a transferencia desta autoestrada esencial para os desprazamentos de milleiros de persoas, para a competitividade da economía e para a seguridade viaria, pois é a arteria de comunicación que vertebra o territorio no que residen o 60% dos galegos.
O Executivo autonómico reclama que esa transferencia se materialice en condicións xustas para Galicia e veña acompañada dos recursos necesarios para a súa adecuada xestión, tanto os fondos necesarios para a execución das obras pendentes, como para o mantemento das bonificacións vixentes.
A conselleira subliñou que a Xunta está preparada para asumir a titularidade da AP-9, xa que coñece en profundidade o funcionamento da autoestrada, as súas eivas, as súas necesidades e a súa evolución.
Destacou que o Executivo autonómico ten experiencia de xestión e un profundo coñecemento das necesidades de mobilidade dos galegos, polo que está disposto a asumir a transferencia da AP-9 e mellorar o servizo que lle dá esta autoestrada aos cidadáns.
A Xunta, incidiu Vázquez Mourelle, traballa e seguirá traballando na defensa dos intereses dos galegos e continuará dando a batalla para lograr unha AP-9 galega, pese á negativa taxativa do Goberno de España á súa transferencia.
Neste sentido, afeoulle ao BNG o dobre raseiro, tras renunciar, no acordo de investidura asinado co PSOE, á transferencia da autoestrada a Galicia.
Tamén censurou que o PSOE tentase baleirar de contido e desvirtuar a transferencia cando a anterior proposición de lei chegou ao Congreso, á espera de ver que argumentos empregará agora para impedir o seu traspaso a Galicia, toda vez que o Executivo central xa deixou clara a súa negativa a ceder a Galicia a xestión desta autoestrada estatal.
