O número medio de afiliacións ao Sistema da
Seguridade Social en Galicia no mes de novembro do ano 2023 acadou a cifra de
1.063.566 para o total do sistema, o que supón un descenso respecto ao pasado
mes de outubro de 2023 de 4.287 afiliacións (-0,40%). Para o conxunto estatal a
cifra de afiliacións sitúase en 20.806.074, rexistrando un descenso do 0,06%
con respecto ao pasado mes de outubro.
Na comparativa interanual (novembro de 2023
con novembro de 2022) obsérvase un aumento de 15.958 afiliacións no total do
sistema en Galicia (1,52%) e un aumento do 2,58% (522.443 afiliacións) no
conxunto estatal.
Por comunidades autónomas e con respecto ao
mes de outubro de 2023, rexístrase unha subida das afiliacións en oito
comunidades autónomas, destacando Madrid e a Comunitat Valenciana (0,95%);
mentres que en nove comunidades autónomas baixan as afiliacións, destacando
Illes Balears (-15,51%). En canto ás taxas con respecto ao mesmo mes do ano
anterior, rexístranse taxas positivas en todas as comunidades autónomas. Os
aumentos máis acusados prodúcense en Madrid e Canarias con taxas interanuais
superiores ao 3,50%.
Datos de afiliacións por provincias
O número medio de afiliacións á Seguridade Social aumentou con respecto ao mesmo mes do ano pasado en todas as provincias galegas.
A Coruña é a provincia que presenta a maior subida nas afiliacións cunha taxa de variación interanual do 1,76%, seguida de Pontevedra (1,60%) , Ourense (0,99%), e Lugo (0,86%).
No que respecta ás afiliacións medias deste mes de novembro con respecto ás do mes de outubro, rexistrouse en Galicia un descenso do 0,40%. Todas as provincias presentan unha taxa de variación intermensual negativa destacando Lugo (-1,11%), seguida de Ourense (-0,69%), Pontevedra (-0,31%) e A Coruña (-0,22%).
Fonte: INFORME SOBRE AS AFILIACIÓNS MEDIAS Á SEGURIDADE
SOCIAL. IGE. Novembro 2023
