É dicir, estarán exentos de impostos os
legados de ata ese importe entre irmáns, tíos, sobriños, sogros, cuñados,
xenros e noras. Ata agora, tal e como explicou o conselleiro de Facenda e
Administración Pública, Miguel Corgos, os irmáns non tiñan que pagar nada se a
herdanza era de como máximo 16.000 € e o resto de familiares colaterais, nos
legados de ata 8.000 €.
O Consello da Xunta coñeceu hoxe o
informe sobre a medida a adoptar no Imposto sobre Sucesións e Doazóns (ISD),
unha decisión que, unha vez en vigor, podería beneficiar “a máis de 9.500
galegos e galegas cada ano”, segundo indicou Corgos, facendo que deixen de
pagar o imposto en torno a un 65% dos parentes do grupo III (colaterais de
segundo e terceiro grado, e ascendentes e descendentes por afinidade).
O Goberno galego continúa deste xeito
afondando na reforma normativa que permite reducir a tributación nas herdanzas
entre familiares directos. Nesta liña, o presidente fixo fincapé en que tras
esta nova modificación “Galicia vai ser a cuarta comunidade” con menos impostos
para os parentes colaterais.
Tal e como explicou Corgos, dunha banda
vaise unificar a redución con independencia do parentesco que se ten respecto á
persoa falecida, de xeito que a redución sexa do mesmo importe xa esteamos ante
unha sucesión a unha irmá ou a unha sobriña, por exemplo. Por outra banda,
vaise incrementar a redución ata os 25.000 euros, o que supoñerá unha
diminución, para os irmáns, dun 56% e para o resto dos parentes dese grupo de
case un 213%.
Máis de 800.000 persoas beneficiarias
Mediante as sucesivas reformas que o
Goberno galego ven realizando do Imposto de Sucesións e Doazóns (ISD), dende
2016 houbo máis de 813.500 persoas beneficiarias desta tributación, ás que hai
que engadir as máis de 13.900 persoas beneficiarias do mellor tratamento fiscal
en herdanzas entre irmáns.
Con estas novas medidas Galicia
convírtese na Comunidade Autónoma con mellor tratamento fiscal neste III tramo
para as herdanzas inferiores a 25.000 € e na 4º nos demais casos.
O
presidente salientou que con esta medida Galicia segue o camiño de apostar pola
rebaixas de impostos. “Levamos anos con rebaixas fiscais e imos seguir así con
rebaixas, pouco a pouco e con sentidiño”, indicou.
