O presidente da Xunta de Galicia, Alfonso Rueda, informou hoxe de que o Consello deu “luz verde” para que o Goberno autonómico “interpoña un recurso de inconstitucionalidade contra a Lei orgánica 1/2024 de amnistía xa anunciado”, logo de contar co ditame favorable do Consello Consultivo de Galicia.
Neste sentido,
destacou que a xurisprudencia recoñece o dereito das comunidades autónomas a
interpoñer recursos de inconstitucionalidade non só para a defensa de
competencias propias senón para o restablecemento da orde xurídica
constitucional. “Sempre dixemos que Galicia actuará con toda a contundencia
cando pensemos que hai normas que atentan contra os seus intereses, como é o
caso”, indicou.
O presidente
salientou que, tras un amplo traballo de documentación, a Xunta recorrerá a Lei
aprobada polo Goberno central ao considerar a Asesoría Xurídica que esta Lei
orgánica “contradí artigos da Constitución como o 9.1”, que establece que todos
os cidadáns e poderes públicos estarán sometidos á Carta Magna e ao resto do
ordenamento xurídico.
Ademais, Rueda
fixo fincapé en que, segundo a Asesoría Xurídica, se trata dunha lei que ten
“consideración arbitraria”, que “quebra co principio de igualdade”, que vulnera
o principio de separación de poderes ao “deixar sen efecto decisións firmes
adoptadas polo poder xudicial” e que tamén “quebra o principio de seguridade
xurídica” ao actuar nun eido tan amplo e indeterminado.
