O director da Axencia Galega de Infraestruturas, Francisco Menéndez, interveu hoxe no Parlamento, onde lembrou que hai un acordo do 2017 polo que o Estado se comprometeu a financiar a totalidade da subvención das peaxes, separando á Xunta do convenio polo que estaba a cofinanciar parte dunha autoestrada estatal.
Por elo a Xunta insta ao Goberno a abonar integramente a bonificación da peaxe do Morrazo e A Barcala na AP-9, cumprindo o acordado, e a modificar o sistema para que a retribución á concesionaria sexa xusta.
Neste sentido, subliñou que tal como veñen reiterando distintas sentenzas, o Estado debe asumir o pactado, deixar de litigar e abonar integramente o pago da bonificación destas peaxes.
Apuntou que a única beneficiada pola situación actual é a concesionaria, que ten a garantía de que se lle vai a pagar por todos os vehículos que circulan polos tramos liberados de peaxe sen limitación, e se vai a beneficiar adicionalmente cos xuros de demora.
A este respecto, reiterou que o Estado debe tramitar unha modificación do sistema retributivo que evite o enriquecemento inxusto da concesionaria.
Criticou o agravio que vén sufrindo Galicia en relación á xestión da autoestrada estatal AP-9 por parte do Executivo central. Así, remarcou que o Goberno segue bloqueando no Congreso o debate para a transferencia da AP-9 a Galicia, pois hoxe mesmo tivo lugar a prórroga número 26.
Puxo o acento nas subas de tarifas desproporcionadas na AP-9, maiores que no resto de autoestradas estatais.
Recordou que o Goberno non aplica liberacións de peaxes na comunidade, como fai noutros lugares como a AP-7 na circunvalación de Alacante.
